ఇంకెప్పుడు….

నిద్రలేవడంలో
సూర్యునితో పోటీపడినప్పుడల్లా
ఎప్పుడూ ఆమెనే గెలుస్తుంది

వాకిలి ఊడ్చి,కల్లాపి చల్లి
రోజొక కొత్తముగ్గుతో
సూర్యోదయానికి
స్వాగత గీతం పాడుతుంది

తనకు ఆకలవుతున్నా
ఇంటిల్లిపాదికీ ఆకలితీరాకే
తాను ఆకలి తీర్చుకుంటుంది

నిరంతరం శ్రమిస్తూ
చిందరవందరగా ఉన్న ఇంటిని
ఇంద్రభవనంలా మార్చుతుంది

కుటుంబాన్ని చక్కదిద్దే పనిలో
ఆమె కళలు అటకెక్కుతున్నాయి
ఆమె కలలు
కన్నీటి సంద్రంలో కలుస్తున్నాయి

వంశాభివృద్ధికీ,దేశాభివృద్ధికీ
ఒక మంచి కుటుంబంకోసం
తన జీవితాన్ని త్యాగం చేస్తున్న
“ఆమె”ను ఇంకెప్పుడు గుర్తిద్దాం
“ఆమె”ను ఇంకెప్పుడు గౌరవిద్దాం