జంతర్ మంతర్ – కొత్త అక్షరాల పాఠశాల

చరిత్రను
పుస్తకాల పేజీల్లో వెతకకండి …
ఈరోజు జంతర్ మంతర్ వీధిలో
దాని కొత్త ఎడిషన్ ముద్రితమవుతోంది !

ఇది కేవలం నినాదాల గుంపు కాదు
వంచించబడిన నమ్మకాలన్నీ ఒకే స్వరంగా సంతకం చేసిన మెమోరాండమ్!
వారి చేతుల్లో ఉన్నవి ప్లకార్డులు కావు
రేపటి భారత దేశపు డ్రాఫ్ట్ కాపీలు!

ఇన్నాళ్లూ మనం పిల్లలకు సమాధానాలు మాత్రమే నేర్పించాం
కానీ వాళ్లు ఇప్పుడు “ప్రశ్నించడమే స్వేచ్ఛకు తొలి అక్షరం” అని
మనల్ని కొత్తగా చదివిస్తున్నారు

ఆ గొంతులో కోపం కంటే
ఆత్మగౌరవపు చురకత్తులున్నాయి
వారి కళ్ళల్లో భయం కంటే రేపటి మీద చెరగని విశ్వాసం ఉన్నది
టియర్ గ్యాస్
ఊపిరిని ఆపగలదేమో ఆలోచనలు కాదు!

లాఠీ
శరీరాన్ని గాయపరచగలదేమో… సత్యాన్ని కాదు !

నీటి ఫిరంగులు
దుస్తులను తడపగలవేమో సంకల్పాన్ని కాదు!

వాళ్లు ఉద్యోగాల కోసమే నిలబడలేదు…
ఉద్యోగమంటే న్యాయమనే అర్ధాన్ని
మళ్లీ ఈ దేశానికి గుర్తు చేయడానికి నిలబడ్డారు

డిజిటల్ స్క్రీన్ లకే పరిమితమని
మనం అనుకున్న చేతులే ఈరోజు జంతర్ మంతర్ ను ప్రజాస్వామ్యపు క్లాసురూమ్ గా
మార్చేశాయి

మనం తలవంచడం నేర్పుతుంటే వాళ్ళు తలెత్తి నిలబడడం నేర్చుకున్నారు

ఈ దేశానికి కొత్త రాజ్యాంగం అక్కర్లేదు
రాజ్యాంగాన్ని బ్రతికించే మనుషులు కావాలి !

జంతర్ మంతర్
ఒక తరం మరో తరానికి బోధిస్తున్న ఉద్యమాల పాఠశాల !

వినగలిగే ఓపిక ఉంటే…
మనమంతా మళ్లీ
మొదటి బెంచీలో కూర్చోవలసిందే!