ఆణిముత్యాలు

చివురులు తొడుగుతున్న
శతపత్రపు సోయగాలు
మకిలి సోకని మాణిక్యాలు

అంతరాల అడుసే అంటని
వికసిత పంకజాలు
లోకంపోకడ తెలియని
ముద్దులొలికే ముద్దబంతులు

అక్షరకాంక్షతో తపించే
సప్తవర్ణ క్రాంతులు
ఊహల కొలనులో రెక్కలు
విప్పిన’ పసి’డి కమలాలు

నిశ్చిత లక్ష్యంతో నింగికి నిచ్చెనలేసే ఆశల తారకలు
తెలివికి పదును పెడుతూ చదువుల మధువును
గ్రోలే తేటిపిల్లలు

నవ్వులు కలబోసిన
విరిసీవిరియని
ధవళ పుష్పాలు

కడుపు పంటలై వచ్చి
మీ ఇంట వెలుగులు
నింపే కన్యకామణులు

ఆంక్షల సంకెలలేసి వారి
ఆశయాల్ని సమాధి చేయకండి

బందీఖానాలో బిగించి
పంజరంలో పక్షులను చేయకండి

వివక్షాకూపంలో గింజుకుంటూ
మీ పెద్దరికాన్ని చిన్నబోనీయకండి

వినీలాకాశంలో ఎగురుతూ
స్వేచ్ఛాగీతాలు పాడనివ్వండి

వాళ్ళు ఉగ్గుపాలతో విలువలు
పొందిన మీ కంటిపాపలే !

ఆత్మవిశ్వాసంతో ఎదిగిన
ఈ జ్ఞానప్రసూనాలే
ఆ’నందనవనం’లో
వెలుగుపూలను
పూయిస్తాయేమో!‌