డిజిటల్ వేధింపులు

నువ్వెక్కడో చేసిన
ఓ చిలిపి చేష్టో
అకారణంగా చూసిన
చెడువాంఛ దృష్టో
ఆమెనింకా
ఇంకిపోయేలా చేస్తున్నది
నువ్వక్కున తీసుకున్న
ఓ చనువు తీరో
తడబాటుగా చేసుకున్న
అలవాటు రీతో
ఆమెనింకా
అభద్రతలో ముంచేసింది
మనుషులం కదా
మారే మనసుల్ని మెదళ్ళను
శరీరంలో వేసుకుని ఊరేగుతున్నాం..
ప్రశంసలకైతేనేమో
ఆలోచనలు అనే సొగబు
తప్పిదాలకు
సెరెబ్రల్ స్టిమ్యులేషన్స్ అనే వాకబు
అలాంటప్పుడు ఉత్తమాటలు కట్టిపెట్టాలి
ఉత్త నటనల మాస్క్ తీసి
చెప్పుతో కొట్టాలి
మోసపోతే బాధితులు అనే
ఈ సమాజానికి
బాధ్యతాయుతులే
బరితెగిస్తారని తెలియాలి