వంటిల్లు – వొడవని ముచ్చట (కిచెన్ కాలమ్)

వీటిని రకరకాలుగా పిలుస్తారు.

తెలంగాణ & మహా రాష్ట్ర లో సుశీల అని..రాయల సీమలో ఉగ్గాని అని పిలుస్తారు.

ఏ పేరుతో పిలిస్తే ఏముంది! రుచిగా శుచిగా ఉంటే చాలు కదా!

ఈ పేలాలు లేదా మరమరాలు చాలా తేలికైన ఆహారం. సులభంగా అరుగుతుంది. ఊరికే కలుపుకొని తిన్నా కూడా ఎంతో బాగుంటుంది

ఇదంతా ఎందుకు కానీ ఈరోజు నేను సుశీల చేశాను. సుశీల అంటే ఒక అమ్మాయి కాదమ్మా! పేలాల తో పోహా లాంటిది లేదా ఉప్మా అనుకోండి.

ఏముంది ఇష్టం ఉన్నన్ని పేలాలు బాగా కడిగి జాలీలో వడగట్టి పెట్టుకోవాలి.

తర్వాత బాండ్లీ పెట్టుకొని పోపు వేసుకొని పల్లీలు పచ్చిమిరపకాయలు స్వీట్ కార్న్ ఆలు, టమాటో, ఉల్లిపాయ కీర కూడా సన్నగా తరిగి వేసుకోవచ్చు కానీ నేను వేయలేదు. ఇవన్నీ ఒకటి తర్వాత ఒకటి వేసి మగ్గించి అందులో కొత్తిమీర కరివేపాకు వేసి ఆ తర్వాత ఈ తడిపిన పేలాలను అందులో వేసి ఉప్పు వేసి బాగా కలిపి మరొక ఐదు నిమిషాలు మగ్గించి నిమ్మకాయ పిండుకొని తినడమే!

రాత్రిపూట తింటే హాయిగా ఉంటుంది! డైటింగ్ పేరిట పచ్చి కూరగాయలు పిచ్చి కూరగాయలు తింటున్నారు కదా ఈమధ్య. అవే బ్రోకోలి లెట్యూస్..
ఇవన్నీ మన దేశపు పంటలు కాదు. అందులో పోషక విలువలు లేవని కాదు కానీ ట్రాన్స్పోర్ట్ లో మన దగ్గరికి వచ్చే వరకు చాలా టైం పడుతుంది అక్కడే ఫ్రెష్ గా తింటే బాగుంటుంది. నిజం చెప్పాలంటే ఏ ప్రాంతంలో పండినవి ఆ ప్రాంతం లో తింటే అది మనకు సులభంగా ఒంట పడుతుంది జీర్ణం అవుతుంది. ఏదో ఫ్యాషన్ కదా అని వాళ్ళు తింటున్నారని వీళ్ళు తింటున్నారని తింటే ఏమో లెండి! ఎందుకు వచ్చిన తిప్పలు!

నేనైతే ఇలా చేశాను. మెక్కేసాను కూడా! అంత బాగుంది మరి..

వీటికి ఇంకా వేరే పేర్లు ఏమైనా ఉన్నాయా! ఉంటే సూచించండి