భాషాసుందరి

అక్షరాలు పట్టు దారాల నడుమ మెరిసిన జరీ బూటాలై
పదాలు పైటచెంగులో ఒదిగిన ప్రకృతి అందాలై
వాక్యాలు అంచుల వెంట బారులు తీరిన హంస నడకలై
సంధులన్నీ పైట మడతల్లో ఒదిగిన ఒంపులై
సమాసాలు చీర కుచ్చిళ్ళలో ఇమిడిన నేర్పులై
అలంకారాలు మేనికి అలదిన అత్తరులై మెరిసిన కావ్యకన్నియ
నిలువుటద్దాన స్వీయసౌందర్యం
అరమోడ్పు కన్నుల పారవశ్యమై
అధరాన విరిసిన చిరుదరహాసమై
అక్షరాలను దోసిట పట్టి అలవోకగా జారవిడిస్తే… అవి
ఘల్లుమన్న మువ్వలై
పరిమళించిన పువ్వులై
ఫక్కుమన్న నవ్వులై
పాలనురగలై పండువెన్నెలై
తెలుగు తల్లికి చేసే పల్లకి సేవ
ఆ పల్లకిని మోసే బోయీలు నేటి బాలలైతే
ఆ మకరందాన్ని గ్రోలే రేపటి తుమ్మెదలై
భాషాపరాగరేణువులను ముక్కున కరచుకుని రివ్వుమన్న పక్షులైతే
పలుకులన్నీ చిలుకలై పాటలన్నీ కోయిలలై
జారిపడ్డ పుప్పొడి రేణువుల్లో
విశ్వవ్యాప్తమయే పచ్చని తెలుగు తోట